عزت الحنفي"

عزت الحنفي"

كبير عائلة "علي حنفي", اسمه الحقيقي حامد محمد حنفي اشتهر بـ عزت الحنفي..
امبراطور النخيلة في صعيد مصر,


النخيلة هي جزيرة في محافظة اسيوط الحنفي جمع المجرمين اللي عليهم احكام و الهربانين و خلاهم كلهم يعيشوا على ارضها, كانت الجزيرة تعتبر دولة جوا الدولة, حاجة كدا خاصة, ارض ليها اهلها و ناسها و قانونها و منفصلة عن البلد انفصال تام.

سنة 2004م استولى اولاد حنفي على 280 فدان في الجزيرة و زرعوا فيها مخدرات دا غير طبعا تجارتهم في السلاح و جرائم القتل اللي وصلت لأكثر من 100 جريمة قتل و الخطف و قطع الطرق و تعطيل و اتلاف المرافق العامة و بلاوي تانية...

لكنهم جابوا آخر الحكومة لما تم منع قوات الشرطة من انها تخش الجزيرة, فـ الشرطة قررت انها تهجم على الجزيرة بعد الاعتداءات دي و تجيب الحنفي, لكن الحنفي كان عامل حسابه و حصّن الجزيرة عن طريق 3 ابراج تم بناءها عند مداخل الجزيرة و حفر خنادق و بنا سواتر الرصاص ميعديش فيها و جاب اسلحة من اول المسدسات لحد مدافع الجرينوف المضادة للمدرعات و ربط انابيب على النخل عشان لو حد قرب منه يفجره و اخيرا خد بعض اهالي الجزيرة كـ رهائن.

قامت الشرطة بمحاصرة الجزيرة و بدأ الاشتباك بين قوات الشرطة و جيش الحنفي اللي استمر لمدة 7 ايام, انتهت بان الشرطة استعانت بفرقة القوات الخاصة 777 اللي قدرت تقتحم الجزيرة و تدخل لحد منزله..

و اول ما الحنفي شاف القوات خلاص دخلت و هتقبض عليه راح واخد سم عشان يموت قبل ما يمسكوه, لكن رجال الامن لحقوه و وصلوا بيه المستشفى و تم عمل الاسعافات الاولية ليه و فضل عايش عشان يتحاكم..

و تمت محاكمته و صدر حكم بالاعدام لـ عزت و اخوه حمدان و تم تنفيذه في يوم 18 يونيو 2006م..


و طبعا كلنا شوفنا فيلم "الجزيرة" اللي تم فيه تجسيد قصة جزيرة النخيلة و قام ببطولته الفنان احمد السقا..