دي بي كوبر - D. B. Cooper"
الزمن: سنة 1971م , المكان: مطار بورتلاند أور في امريكا
ركب المسافرين الطائرة المتجهة إلى مدينة سياتل في ولاية واشنطن, كل حاجة ماشية طبيعية جدا لحد ما الطيارة بقت في الجو..
"دي بي كوبر" استدعى احدى المضيفات و قالها بكل هدوء انه معاه قنبلة و هيفجر الطيارة دي باللي عليها, طلعت تجري على كابتن الطيارة عشان تقوله لكن الكابتن نفض و افتكرها اشتغالة, "كوبر" مستناش و راح وراها على الكبينة و معاه شنطته اللي فتحها قدام الناس ووراهم الشحنة المتفجرة, و سيطر على الطيارة و الطاقم بتاعها.
و اول حاجة "كوبر" امر بيها الطيار هو انه يتصل بكل القيادات و ابراج المراقبة و يقولهم ان الطيارة اتخطفت, و طلب منهم طلبين,
الاول: انهم يجهزوا 200 الف دولار و إلا هيفجر الطيارة.
الثاني و اللي مكنش حد يتوقعه: انه طلب 4 باراشوتات!
وصلت الطيارة إلى مدينة سياتل استلم الفلوس و الباراشوتات و افرج عن الركاب و امرهم انهم يحطوا وقود للطيارة و فضل حابس طاقم الطيارة كله,
امر الطيار انه يطلع باتجاه المكسيك خارج حدود امريكا.
القيادة الامريكية مسكتتش و بعتت طيارة حربية تتبع خط سير الطيارة المخطوفة و كانوا متأكدين انه مش هينط لأن القفز من الطيارة دي يعتبر انتحار لأنها بتطير بسرعة كبيرة جدا تصل لـ 1000 كم/ساعة و على ارتفاعات عالية دا غير انه معهوش معدات للقفز ولا الملابس الواقية حتى, و اعتقدوا انه طلب الباراشوتات عشان يراوغهم مش اكتر.
لكن "دي بي كوبر" كان متهور لدرجة متخيلهاش رجال الامن, امر الطيار انه يقلل السرعة على قد ما يقدر و يقلل ارتفاعه شوية, و خلى المضيفة توريله باب الطوارئ و كانت دي آخر مرة حد يشوف فيها "كوبر"..
تم تحديد مكان هبوطه و القيادات وجهت كل رجال الامن اللي في المدينة للمكان دا لكن لم يتم العثور إلا على الباراشوتات اللي استخدمها و الكرفته بتاعته و حتى الآن محدش يعرف عنه اي حاجة.
*اسم "دي بي كوبر" دا مش اسم المجرم الحقيقي دا اسم مستعار هو استخدمه, و الصور اللي موجودة ليه هي صور الرسام الجنائي بناءا على اوصاف الشهود.
ليست هناك تعليقات:
إرسال تعليق